كثير أشيا ..!
مساء أنفاسنا .. حُرقَـة وَلَعْـنا بيـن لَسْعٌ و كَيّ
ـــــــــــ ملايين القُبَـل تُخجِل ألـذّ خْدود في الـدُّنيا !
مـساء أتنـبّئِك إنّـك إلهـةَ قَـلب مَلْوي ليّ
ـــــــــــ على صدرِك .. واسلِّـم لك و اقـرّ بصـحّة الرؤيا ،
مساءِك فاتن ومغري.. مساءك ما حصل يا دْبيّ
ـــــــــــ أمرّك في عَجَل .. لكنـّي أتـذكّر كـثير أشـيا
مساءك أعشقه لو مزدحم .. يا كرنفال الضيّ !
ـــــــــــ و أنا بالساعتين أحـيااان ..في السيـّاره أتـريّا !
دْبي ادبيّ.. موعدنا تجدّد و اللـقا به غَـيّ
ـــــــــــ أدوخ.. أتنرفز و يُغمى عليّ .. لْـروعة اللـقيا !!
فديتِك .. و إنتي لي أمْ و أبو .. و إنتي أخِت واخوَيّ
ـــــــــــ و أحسّ إنّي قبل شوفة عيونِك ، كنت أنا عَـميا !
كأنّ سنين مرّت دون لا اضمِّك يا دار الحيّ ؟
ـــــــــــ تعبت مْن الغياب.. و راحـتي إنتي مِـن الإعْـيا
دْبي ادبيّ ..أتساقط من اللذّه .. و اذوب شويّ
ـــــــــــ دخيلِك ظلّليني داخــلِك لو لحظــه أتفـيّا
لأنّي ما أقاوم سحرك الشـرقي .. أجيـلِك طَيّ !
ـــــــــــ ضعيفه حيييل قداّم الجمال .. آموت بِك و احـيا !!
حرام أتعذّب و آنااا .. صِغـيرونه قليبي نَيّ
ـــــــــــ رغم هذا .. بتـعذيبِك قْلـيبي رحّب و حيّـى !
أمرّك هالمسا .. مشـتاقه لحُضنِك و أمدّ يْديّ
ـــــــــــ و عيـني تذرف الدمعه على أحلام مـاضِـيّــا :
تذكّرتِك طُـفوله طاهـره طُهر الندى و الـرَيّ
ـــــــــــ ظفائر ، شنطـه ، وأقلاااام ..و امّـي تاخذ بْـيَـديا
و طابور الصباح و فرحتي به .. و اخضرار الـزيّ !
ـــــــــــ لْـعْبنا .. التوأمين بـمدرسـتنا ” عـائشه وعَـليا ”
وربيعاتي .. و دكاّن “الخوانيـج1” و عيال الحَيّ
ـــــــــــ ورحلتنا إلى “الممزر2” .. و راعي الباص “بـو يحيى” !
و “مْديّه3″و ” العوير4″ و من هواهن مول أنا ما اعَيّ
ـــــــــــ و أبله “غايه” .. و يوم أطلـع الأولى و هْدِيّتْــيا5 ،
و غُوى “السْمر المزايـين” اللي أبْداً ما مِثِلهم زَيّ !
ـــــــــــ وْ وناسةْ ناسي و “يولة6” بني عمّي ..وْ طَرب هَـلْيا 7!
تَرَفْنا .. عزّ “بو راشد” و خيره ، و الف شيّ و شـيّ !
ـــــــــــ كثير أشيا تذكّرنـي بِـك و أسرح مع الـطريـا
دبي ادبيّ عشّاقك .. كثر ما بالبحر مـن مـَيّ
ـــــــــــ يحبّونِك على حـدٍّ سَــوا الامـوات و الأحـيا !
و كثر ما نهتوي “فزّاع” .. نهوى مُشمسِك و الفيّ
ـــــــــــ سعيـدين و لنا نْفـوس بكرم الاكرام مْمْــتَلْيـا
حصل لي في مساءك شيّ ما عمره حصل يا دْبيّ
ـــــــــــ تذكّرت الهوى و كم إنتي تعني لي “كـثير أشـيا” !
1و2 و4 : أسماء مناطق في دبي .
3: اسم صديقتي
5:و تعني هديتي، (كلمة محليّة)
6: رقصة شعبية
7:و تعني أهلي ، (كلمة محليّة)
يا مرحبا بج يا زعفرانه..
صح لسانها وعلى شانها ..
ابيات جدا جميلة ..
والله يحفظ لنا هالشاعرة المتألقة ..
تسلميين الغاليه ع القصيدة الحلوة ..
ربي يعطيج العافية ..
الله يوفقج ويقويج ع طاعته ..
تقبلي مروري
خويتج : shy heart
حلوة الكلمـآت
تسلم الأيـآدي
يسلموؤ ع الطــرح الطيب
فمـآن الله