يا ملّ قلبٍ ظروف الوقت تلعب بّـه
من وين ما راح هَمّه متجه صَوبـه
غديت مثل الغريـق بداخـل الغبّـه
حيران بأمره وموته جـاه مندوبـه
ماهوب لاقي ولا شيّ يتقضـب بّـه
والموج عاتي وضاع الفكر وأسلوبه
من وين ما اروح اشوف النار مشتبّه
شرق وجنوب وشمال الوجه وغروبه
وقتي تردّى معَي واحترت في طِبّـه
والحظ عيّا يقوم وضاقـت دروبـه
والذنب ماهو بذنب الوقت .. ما أسبّه
الذنب ذنبي و كـل انسـان بذنوبـه
الله يسامحك ياشخص ٍ هو السبّـه
في غلطةٍ صارت بعشرين محسوبه
وشلون أصدّق علوم خبُول ومسبّـه
نقّالة الهرج بين الناس ..والكوبـه
الله يكتب لنـا حلـم نتصبّـر بـه
في وقت قاسي ونار الهَـم مشبوبـه
جاملت وأزريت والطَبّه هي الطَبّه
غلطة عُمر للعمر فاللـوح مكتوبـه
تسعين صاحب غدوا فالعاصفه هَبّـه
واليوم عذّرت منهم واعلن التوبـه
يكفيني اللي يجاوب حين مـا أنبّـه
كريم سبلا لو إنـي بطلبـه ثوبـه
صادق نوايا معَي ماهـوب متشبّـه
النيه الصافيه والصـدق عذروبـه
…
الشاعر عايض بن سليم
ويسلمووو ع الموضوع
ربي يعطييج العااافيـه..
تقبلي مرووري..
..