البريوش 2024.

السلام عليكم ورحمة الله وبركاته

زارتني اختي بالبيت مع عيالها العصر وبالعاده لما حد ايني احب اسوي خفايف مع السوالف فماحبيت ابخل عليكم بالطريقة وحبيت اشارككم فيها والخبز الفرنسي له اكثر من طريقة وعسى تنال استحسانكم .

المقادير :

4 كاسات طحين رقم (1) ، خاشوقة اكل خميرة فورية ، مثلها بيكن بودر ، ذرة ملح ، فنجان سكر، نص كأس زبده سايلة ، كأس حليب بودرة ، 2 كاس ماي دافئ .

الطريقة :

1- نخلط الطحين والبيكن بودر ضربة .
2 – في مله غزيرة نحط الماي ، الحليب ، الخميرة ، السكر والزبده ونخلط .
3 – نحط عليهم الطحين بالتدريج مع الخلط واخر شي رشة الملح ، ونعينها لين ماتصير عندنا عجينه لينه وطرية . نغطيها ونخليها في مكان دافئ لين ماتستوي بوتمبه .
4 – على سطح نظيف انزل العجينه ونسويها على شكل رول بدون مانعجنها ونقطع الرول لقطع متساوية ، وبعدها نكور كل قطعة .
5 – ناخذ كوره من كور العجينه ونمدها باليد على شكل اسطواني طويل ( حركة تكون من راحة اليد للاصابع ومن منتصف الى الاجزاء الاخيره من الشكل الاسطواني ) مادري اذا وضحة الفكرة او لا.
6 – ناخذ الرولات او الاسطوانات الي سويناها ونخليها على شكل + مش على بعض ولكن كل رول بجهه ونجمع راس الاسطوانات مع بعض . ونبتدي انلف الي في الشمال يروح للجنوب والي في الجنوب يروح للشمال والي في اليمين يروح يسار والي في اليسار يروح لليمين وهاكذا لين مانحصل على ضفيرة او عقص ، ونجمع ذيل الضفيرة مع بعض عشان ماتنفتح بالخبز .
7 – نحط الضفيرة في قالب الخبز ونتركها في مكان دافئ تتخمره ويتضاعف حجمها .
8 – نخلط صفار بيضه وانا هني احب استعمل معاها شوي من القهوة السريعة الذوبان بدون نكهه ، صدق تقطع ريحة البيض وتعطي المعجنات لون ذهبي وايد حلو . وندهن بها العجينة بلطف وندخلها الفرن لين ماتستوي .

انا صورت لكم قالب الخبز عشان يتضح شكله بس للاسف ماصورة العجينه لانه ايدي كانت خايسه طحين وقتها السموحه .

وبالعافية ،،

خيارات :
1 – ممكن نرش عليها سمسم او حبة البركة او اعشاب عطرية بعد دهنها بالبيض .
2 – ممكن نخلط مع الطحين قبل العجن اعشاب عطرية مجففة او حبة البركة .
3 – ممكن نحشي كل ضفيرة بجبن ونسكرها عدل عشان مايطلع الجبن .