السلام عليكم ورحمة الله وبركاته…
أكله حلووة ولذيذة… للي يحب المعكرونة والأكلات الإيطالية… تشبه الباشمل..
بس طعمها مختلف…..
حصلتها فموقع… وغيرت فيها اشيا… للتتناسب مع ذوقنا…
وانتو ممكن تغيرون فيها على اللي يناسبكم بعد…
معكرونة الطبقات الثلاث… ان شا الله راح تعجبكم…
سوويتها اليوم لاخواني وعجبتهم واايد… والبايركس انمسح… :roll1: …
يالله بسم الله الرحمن الرحيم…
للطبقة الأولى:
كيس معكرونة اسباغيتي
ماي للسلق
ملح
ملعقة كبيرة زيت نباتي
فلفل أسود
أعشاب وتوابل إيطالية "أنا استخدمت هالتوابل المعروضة من اختياري وحصلتها في كارفور وبعد في الجمعيات " وممكن تحصلون التوابل الإيطالية Italian herbs في الميغا مارت او هالنوعية من المحلات بس انا الصراحة ماحصلت عندنا يمكن تحصلون عندكم…. ووممكن تستخدمون مكعب ماجي وان شا الله راح يعطي طعم حلو بعد….
للطبقة الثانية:
بصلة مقطعة شرائح
4 فصوص ثوم مهروسة
علبة فطر مقطع
مكعب ماجي
ملعقة طعام بهارات مشكلة
نص ملعقة صغيرة فلفل أحمر
نص كيلو لحم مفروم
ملعقتين كبار صلصة البيتزا أو ممكن صلصة طماط عادية
التوابل المعروضة فالصورة أو التوابل الإيطالية…
للطبقة الثالثة:
كوب ونص مرق دجاج… (نص مكعب ماجي يطبخ عالنار مع كوب ونص ماي)
كأس جبنة سائلة (كرافت أو المراعي أو بوك….)
علبة قشطة
جبنة موزاريلا مبشورة
أوريغانو Oregano وممكن نستبدله بالزعتر
الباربيكا (بودرة الفلفل الأحمر البارد) وممكن تحصلونه في اي جمعية صوب البهارات
للطبقة الأولى:
نسخن الماي فالجدر لين يغلي.. ونضيف له الملح والزيت… والاسباغيتي..
ونتركه لين ينضج… وتقريبا ممكن يحتاج من 20 لين 30 دقيقة…
نصفيه من الماي ونرده للجدر… وونضيف الفلفل الأسود والتوابل الإيطالية حسب الرغبة…
للطبقة الثانية:
نقلي البصل لين مايحمر شوي وعقب نضيف الثوم ونتركه لين يحمر… ونفس الشي للفطر..
عقب نضيف مكعب ماجي وكل البهارات المذكورة.. ونحمسها شوي…
عقب نضيف اللحم المفروم ونقلبه لين يتغير لونه
نضيف الصلصة… ونقلبها مع كل المكونات… ونتركها تطبخ لمدة عشر دقايق على نار هادية مع التحريك عشان مايحترق القاع…
نضيفها عالمعكرونة ونخلطهم مع بعض ونحطهم في بايركس كبير…
للطبقة الثالثة:
نحط الجبنة السائلة والقشطة فالخلاط… ونضيف عليها مرق الدجاج… ونخلطهم لين ينمزجون عدل…
نصب الخلطة عالمعكرونة…
نرش جبنة الموزاريلا المبشورة عالسطح
ونرش الأوريغانو أو الزعتر…
وآخر شي الباربيكا…
وندخلها الفرن والحرارة من تحت… لمدة تتراوح من 30 لين 40 دقيقة…
وعقب نحط الحرارة من فوق لين يحمر الويه…
وهاي هو داخل الفرن عقب ما استوى
وبالعااافية…
**ملاحظة:
_نلاحظ انها احنا مانضيف ملح فالطبقة الثانية لانه ملوحة الماجي تكفي وتوفي الا اذا انتو حسيتوا انها محتاج لملح اكثر,,,
_بالنسبة لي أفضل عقب ماتنضج الطبقة الثانية انها نضيفها عالمعكرونة ونخلطهم مع بعض…
لانه الطريقة الاصلية انه انحط طبقة المعكرونة فالبايركس وفوقها خلطة اللحم وفوقها الخلطة الثالثة…
طبعا هالشي راجع لكم وللي يعجبكم…
متسوقة وحضرة
ينطيج العافية ع الاكل وانا يوعان اليوم ما اتعشيت عدل
ذاك العشى السنع اليوم اوني مال اتكيت وما دريت انه الاتكيت يخليني يوعان
الله كريم 🙂
وانشالله اجربها:)
ما شاء الله عليج يا وردة جووووري…
طباخه ماهره..
والصراحه شكل الاكله وايد حلوه..
بطرشلج رقم البريد..وطرشي لنا..خل نجرب..لوول
تسلم ايدج والله على هذا المجهود..
ويعطيج العافيه..
بن ماكس
اخوي خيماوي تسلم على هالطلة الحلوة…
وان شا الله المرة الياية تنسى الاتكيت وتاكل على راحتك :icon_chee
اختي دلوعة..
الله يسلمج ومشكورة على المرور… وان شا الله نشوف صورة لتطبيقج… 🙂
اخوي الامبراطور تسلم على هالمرور الجميل…
الله يسلمك ويعافيك اخوي بن ماكس..
وهاي من ذووقك… وشكلك تحب المعكرونة…
مشكلة مالها حلاا الا وهي حارة.. يعني سالفه البريد ماتنفع.. :icon_chee
والله يعطيكم العاااافية
هاي المعكرونه اللي قلتي لي عنها
شكلها لذيذ
إن شاء الله اسويها بيوم بس بغير نوع المعكرونه
وراح اسويها بالدياي
نسيت اخبرج سويت البسبوسه بخبرج الجمهور شو رايهم أقصد أهلي
تسلم اييدج على المعكرونه
ويعطيج العافيه ع الوصفات الحلوه
وننتظر المزيد
اشحالكم …
ورده لاتنسين ..يووم ترسلين حق بن ماكس كملي معرووفج وارسيليها حقي …
وسالفت باارد مب مشكله شي اختراع اسمه مكرويف مادري ش اسمها ….
يسلموو على الطبخه
سلامي
aL3qRaB
::
جي .. الناس .. ايحطون موضوع
الصراحه .. الطبخه شكلها .. فله
:
يبالنا .. انجرب .. ويا العقرب ..
::
في امان الله
اختي سراب…
الله يسلمج ومشكورة على هالطلة الحلوة…
وايه هاي هي المعكرونة…
وانا بانتظار اراء الجمهور :icon_chee…
ونبي نشوووفج مطبقة هالمعكرونة.. :)…
اخووي العقرب..
وعليكم السلام ورحمة الله وبركاته…
ان شا الله اخووي… عاد لو صارت اي حالات تسمم جماعية عندكم فاالامارات..
انا مش مسئولة…:icon_chee
تسلم اخوووي دينجر…
وهاي من ذوووقك…
عاد مثل ما قلت للعقرب…
انا باطرش… بس لين صار لكم انتو الثلاثة شي انا مالي خص…
اذا تم المنتدى من غير ادراة 😳
والله يحميكم ويحفظكم من كل شر