معكرونه بخلطه الجبن 2024.

– معكرونه
– دياي مبهرتنه شوي مع عصره ليمون وحجم القطعه حسب ما تحبين
– بصل شرايح
– ثوم + زنجبيل مدقوق
– جزر شرايح
– فلفل حلو شرايح
– فلفل حار اختياري
– بقدونس مفروم
– ورق ما اعرف شو اسمه انا اسميه كاري وفي ناس يسمونه غار بس اعتقد ولا واحد صح
تحصلونه بالجمعيات صوب الخضره مجموعه اغصان فيها أوراق خضر ريحته اتييج على البهار الهندي .. يعني ورق طازج مب جاف وحلو لو تستخدمينه بالصالونه او لما تفورين العيش يعني ريحه حلوه ونكهه ونحن نستخدمه بأكثر الطبخات اقول معلومه مب مقادير
– بهارات ( بزار . كركم . بقدونس مجفف مطحون. نعناع مجفف . خردل حب . كمون . مكعب ماجي) او اي نوع من البهار تحبينه وانا انوع مرات استخدم الزعتر والبابريكا
– جبن موزريلا و جبن شيدر

الطريقه

تحمسين البصل في شويت زيت .. تضيفين الخردل الحب .الفلفل الحار . رشه كمون و الورق اللي شرحته بدايه شفتوا شكله … لين يذبل البصل

نضيف الدياي اللي كنا مبهرينه قبل وانا استخدمت الصدور لأني ما احب الريل وقطعته قطع صغيره بدون عظم عشان آكل اسرع وضفت عليه الثوم والزنجبيل ونخليه شوي لين يستوي الدياي

نضيف الجزر ومكعب ماجي ونخليه شوي ولازم نحرك بين فتره والثانيه

نضيف الفلفل الحلو والبهارات اللي حابينه ولا تكثرون من البهار ونخليه

نسوي المعكرونه

وانا هالمره ع حظكم حبيت اجرب نوع من المعكرونه واللي هو معكرونه بالجبن .. شفته بالجمعيه ولفت نظري فخذته

بس حسيت يوم اسوي بالمعكرونه العادي احلى من هذا … لأنه هذا فيه نكهة الجبن المعفن اذا انتوا متذوقينه أو اللي متذوق معكرونه بيتزا هت بالصلصه البيضه نفس النكهة وما تعجبني وايد

نضيف المعكرونه والبقدونس على الخلطه ونحركه .. وخلوا شوي ماي ويا المعركرونه احلى

نضيف الجبن وانا هالمره استخدمت جبن موزريلا وجبن شيدر وما كثرت لأنه المعكرونه فيها جبن
وتقدررون تستخدون جبن كرافت السايل أو اذا حابين شويت مايونيز .. حركوه وطفوا النار وخلوه شوي وعقب كلوا بالعافيه