الديج والمصير 2024.

السلام عليكم

هذي سالفتن يا شيباننا حصلت زمان اول كان فيه واحد ساكن له في بيت طين هو وحرمته وعييله الدبهرق وعنده في هالبيت حوش حاطن له فيه شاة وعنزين يحلبونها وتفوح ام العييل الحليب في بريز الغضار الاحمر ويشربون منه الين تتفخوا ورانين في هالبيت ..قال ابوهم ورا ما اجيب لي كم دجاجه وديس واحطها في الحوش مع هالغنم .. ومنها لحم وبيض يعني تموين منزلي

وجاب له من هالدجاج البلدي مع كم ديس من هالديسه اللي تقول رقبة الواحد منهم كنها سارية بيرق من كثر الاذان ونثرهم في الحوش مع هالغنم.. ومعد تسمع الا قوقات هالدجاج… ومسيان صرقعة اذان هالديسه الين تظهر النجوم ..ويكتب الله ويسكن في البيت اللي جنبهم شباب عزوبيه ومتعافين كل واحد يدربي راسه من العافيه والعياره ..وخبركم الاولين مهنا تدقيق وش الجار عزوبي والا متأهل.. ابد النيه طيبه وصافيه ..وهاك الحين قل ومهناش والشي شفاقه ….المهم هالعزوبيه قال واحد منهم وش رايكم ننقز على حوش جارنا ونصيد لنا دجاجه ونتعشاها..وكان فيهم واحدن عيار وراعي افكار وتصاريف عجيبه ..قال لا وشو له التعب ومطامر الجدران .. أنا عندي الراي ..قالوا وشو؟؟ قال راس مالها مصير من عند القصاب ..ابي واحدن منكم باسر ينقز للقصاب ويجيب لنا مصير عنز والا شاة .. وقام واحدن منهم وجاب المطلوب ..قال هالعيار الدبره عندي ..وعقد في طرف المصير عقده ثم نطره من فوق الجدار على هالدجاج ..وجاك هالدجاج مكيم صافطن طبلونه ( خبركم الدجاج عينه قويه وحار بطن ولا هنا دبره كل شي ياكلونه السعاود والسحابل والخنافس ..يعني عمال نظافه الله يجيرك ) المهم ولا تسمع الا مكافخ هالدجاج على هالمصير يحسبونه سعوده… وزقعه واحد من هالديسه المصافيق ..وصاحبنا يوم حس ان السناره غمزت قام وتفخ المصير بقوه ..وينتفخ بطن الديك ولاعد قدر يلفظ المصير نشبة العقده في حلقه <<< الله من السنع خل اللقافه تنفعك ..المهم هالعيار قام وسحب المصير وجاب الديس معه ..ولاعاق معهم نتفوه وسووه مرقه… وصاروا على هالحال وهالمصير السحري معهم ..وعشاهم على الله ثم عليه

ودمتم مطرمحين