يقول الي خلص عمره من اسباب الوقت مهموم=خلص عمري و انا كل يوم تتكاثر معاناتي
ولكن ضيقة البارح ويتبعها نهار اليوم=الا يا ضيقة البارح تعدت كل ضيقاتي
سببها عفت مرقادي ولا عيني لفاها النوم=عليم الله ما جاني المنام وزادت اهاتي
فقدت انسان بغيابه احس بخافقي مصدوم=تكَدر خاطري وغابت عن الوجه ابتساماتي
علئ عودً وسط هاك القبور الموحشة مضموم=عليه من الدمع هليت ثم جريت وناتي
بعد غاب القمــر وش فايدة في طلعتك يا نجوم=ولا ظني بعد مثلك ياوالد بالزمن ياتي
الف وسفى فقدتك وأصبحت من شوفتك محروم=جداي اصفق علئ كفي وعليك تهل دمعاتي
بكـيتك كثر ما حنت علئ فقدك رجال قروم=بكيتك كثر ما تشفق عليه يوم غيباتي
بكيتك كثر ما يبكي سجين وبالسجن مظلوم=على شوفة محبينه بكاهم كل ما باتي
بعد فقدك احس بعيشتي يا والدي مشؤوم=أيا ليت الجسد مع موتتك يا عزوتي ماتي
لو أن يُفدى العمر والله عمري لك فدا محسوم=ولكن العمر يا أبوي مثل المزن لا فاتي
ولكن اوعدك مني فــ لا ظني يجي لك لوم=على بالي وصاتك يوم قتلي نفذ أوصاتي
ما دامك خلصت عمرك عن علوم الردئ محشوم=انا مثلك عن المنقود والله يبتعد ذاتي
الا يا حر مداهيلك براس النايفة ورجوم=ابشرك بالعلوم الغانمه هذه هواياتي
ما دامك حر معروف النداوي ما يجيب البوم=جعلني اجملك يا أبوي في فعلي وهداتي
مماشيي مع رجالً وفيه ما نصيت رخوم=احب امشي مع الطيبين هذه غاية مناتي
انا بدري من رجالً عدونا باللقا مندوم=من عيال الهوئ لطامة العايل أليا هاتي
ظنا وايل زحازيحً حداهم للمعالي يزوم=بمدحهم تعجز القيفان ثم تعجز عباراتي
ختمت القاف ما ودي اطول في مديح القوم=لاني لا مدحت رجالنا ما أعلن اسكاتي
وختام القاف ادعي اللي عليم البوح والمكتوم=الاهي ترحم بعودً بفقده كل لوعاتي
وصلاة الله على الهادي نبينا من الخطا معصوم=عدد هل المزون وعد ما أنطق حكاياتي
لشـــــــــ عبـدالله لهمود العنزي ـــــــــــــــــــاعر من ( العراق)
ما حد يحس بنعمة الوالدين الا من فقدهم
وانت رسمت هذة المعاناة بابياتك …فعشنا واقعك
صح لسانك ولا هاان منطوقكـ…وبانتظاار القادم من ابياتك
عسى ايامكـ بعيد .. الضيق ..,
والرب لكـ حافظ
تصدق عنه وادع له هذا الي يبيه منك
صح لسانك ولا هنت
يعطيك الف عافية