السَلامُ عَلَيْكُم و رَحمة الله و بَركاتَـه . .
مَرحبا مَرحبا ، بكل من يشَرف هالصَفحَة 
. .
طَبعاً أغلَبكم يعَرف إني لي قصَة فالنَبض ،
عنوانهَأ : أنا الوأقـف علَـى القمَـة . .
القصَة ترُمس عَن بنت توهَـأ متخَرجَـة من الثَأنويَـة العامَـة
و على أعتأب الجَأمعَـة . .
فـ شويَـة أحتاجكُم عسَب أكَمل قصَتي ،
أنا توني أول ثنويْ ، يعني ماعَرف أي خَلفيَـة عن الجَأمعَـة !
و مأعَرف كيف النظأم بالضبط ، أعَرف أشياء بسيطَة جداً لا تودي ولا تييب
فَـ بغيت حَد يشرَح لي عَن الجَأمعَـة و كيف نظامها ؟ ، من الصُفر Pleeze !
لأنُـي ماعَرف شَي ،
و شو التخصصات و كَل شَيْ ،
و شُو الجَأمعَـأت اللي يكُون فيها سَكن ؟ و كيف السَكن
و يعني كيف نظام المحاضرأت
أتمَنى تشرحولي نَفس ماتشرحون حق اليهَأل ، يعني من الصفففر
لأني ماعرف ×_× . .
و أكيد انتوا أدْرَى عني بهَآلسُوالف ، و ياليت تذكرولي بعَد أسامي بعض الجأمعَات ،
يَعني بغيت كل حَد يدخَل هالموضوع يشرحلي و لو شَي بسيطْ ،
أو أي شَي عَن الحَياة الجَأمعيَـة ، 3> . . . .
و تحيتي لكم ،
.
.
الحياة الجامعية مجسم عووود للمدرسة
تقريبا نفس المدرسة بس باسلوب ثاني
خلينا ابدا وياج ع الجامعات والتخصصات
عندج جامعة زايد ( ابوظبي _ دبي ) << فرعين .. و البنات الجامعة يزقرونها زي يوو دلع يعني zu
وعندج التقنيات العليا hct تحصلينها فكل اماررة
عندج جامعة الامارات المقر الرئيسي العين
هذول جامعات حكومية مشهورة ع مستوى الدولة صارت كلها تعطي البكالوريوس
طبعا ترتيب الشهادات للتعليم العالي كالتالي : دبلوم >> دبلوم عالي >> بكالوريوس >>………..
وشي شهادات اقوا عن البكالوريوس
جامعات اخرى
ابوظبي :
جامعة خليفة ( بكالوريوس هندسة بكل تخصصاتها )
كلية فاطمة للعوم الصحية ( دبلوم علوم صحية ـ بكالوريوس تمريض )
المعهد بترولي ( بكالوريوس هندسة )
كلية الامارات للعلوم والتكنولوجيا
كلية الامارات للتطوير التربوي ( بكالوريوس تربية )
معهد التدريب والتوظيف المهني ( ماعرف شو شهادتهم ؟؟)
الخاصة
جامعة ابوظبي
جامعة السوربون
جامعة نييورك
جامعة الحصن
هذول اللي اتذكرهم الحين
عندج فدبي جامعة حمدان خاصة يدييييدة
تخصصاتهم ع ما اتذكر علاقات عامة
موارد بشرية
ادارة
طبعا كلهم بكالوريوس
غيرهم فالامارات الثانية
المعروفين جامعة عيمان
والجامعة الامريكية
والمجتمع
والاتحاد
وما اعرف غيرهم بعد
طبعا حطي فبالج اغلبية الجامعات بكالوريوس
يعني بتدرسين سنة فاونديشت ( تاسيسي ) + 4 سنوات تخصص ع حسب النظام فالجامعة = 5 سنوات ويمكن اقل
طبعا تختارين تخصصج ع حسب ميولج و ع حسب شهادتج فالثانوية
النسبة ؟؟
ادبي ولا علمي ؟؟
اذا انتي انسانة ادارية تختارين التخصصات الادارية ( شهادة ثانوية عامة ادبي )
علاقات عامة _ ارشاد _ علم النفس _ اعلام _ موارد بشرية _ الاقتصاد _ محاسبة _ تمويل _ احصاء _ مصارف _ والتربية _ وقانون عام وخاص وشريعة _ عربي – جغرافيا – تاريخ – وغيرهم
اذا انتي انسانة حركية وما تعرفين تقرين فمكان واحد واتحبين التفكير تخصصات علمية
فيزيا _ كيميا _ احيا _ جيولوجيا _ بساتين _ زراعة _ تغذية _ هندسة بكل فروعها _ رياضيات – طب – تمريض – علوم صحية- وغيرهم
النظام فالجامعات من حيث الغياب
لو مادة غبتي عنها 5 مرات تعتبرين راسبة << الرقم تحدده الجامعة .. اعطيج مثال بس
النظام الدراسي
شي جامعات يمشون ع السنوات وشي جامعات ع الفصول ( كورسات )
الفصول ( تدرسين المادة فصل كامل )
السنوات تدرسين المادة سنة كاملة
طبعا اثنيناتهم نفس الكمية لا يغرج يعني
الجامعة شي ثاني
مسؤوليتج الخاصة
انتي تهتمين بجدولج وكلاساتج وشو تبين تاخذين وما تبين تاخذين
انتي تتحملين مسؤولية كل شي
يعني حركات تقردين مدرسات وهالسوالف انسيها
حطي فبالج انه بتشوفين اشكال وانواع فالجامعة
عادي يدرسج استاذ افريقي
وعادي اتدرسج مس هندي ولا استاذ ايراني ولا مس عراقية
يعني كل الجنسيات واللهجات ع كييف كييفج
طبعا تحطين فبالج مواد الجامعة كل وحدة فكلاس خاص فيها
و طبعا بنات كلاسج مال كل مادة غييير عن الثانية الا اللي تسجلون ويا بعض وتتفقون وحالة
اممممم شو بعد تبين تعرفين ؟؟؟؟
قلتي السكن
جامعة الامارات تقدم سكن
وعندج جامعة عيمان ع ما اتوقع تعطي سكن
وعندج كلية الامارات للتطوير التربوي تعطي سكن * شرط القبول فالكلية انه جوازج لازم يكون صادر من بوظبي
السكن معناته انج تطلعين من البيت يوم السبت واتردين الخميس
واتكونين مسؤولة عن نفسج بعيدة عن اهلج
مسؤولة عن ترتيب غرفتج فالسكن وثيابج واكلج وكل شي يخصج
تنظفين بروحج ووكل شي
ههههه بس الاكل الله يخلي المطاعم
امممم طبعا فالجامعة حرية كااااملة فلبسج مب نفس المدرسة
يعني بتشوفين اشكال والوان وبتلتقين فبنات من كل صوب وجنسيات مختلفة ولهجات مختلفة وعادات مختلفة وافكار مختلفة وديانات مختلفة ومذاهب مختلفة
اعطيج لمحة ع المحاضرات
عادي تحصلين محاضرة مدتها ساعتين
ومحاضرة ساعة وربع
ومحاضرة 50 دقيقة
ومحاضرة ساعتين الا ربع
ع حسب المادة اللي تسجلين فيها
وطبعا عادي يكون عندج فراغ ساعة ولا ساعتين بين محاضرة ومحاضرة
وعادي اول محاضرة لج تبدا الساعة 12 الظهر او 3
وعادي يكون عندج محاضرة وحدة فاليوم
وفاليوم الثاني 4 محاضرات
وطبعا النجاح فالمادة من 100 درجة
مقسمة ع امتحان منتصف الفصل ونهاية الفصل وبروجكت وكويزات واشيا ثانية يحددها استاذ المادة
وكل كمية معينة من الدرجة بتقدير
مثلا لو يبتي من 90- 100 تقديرج يكون a فنهاية الفصل
ولو يبتي 85-89 تقديرج يكون b+
ولو يبتي 80 – 84 تقديرج b
ولو يبتي 75-79 تقديرج يكون c+
ولو يبتي 70-74 تقديرج يكون c
ولو يبتي 65 – 69 تقديرج يكون d+
ولو يبتي 60 -64 تقديرج يكون d
واقل عن 60 f يعني راسبة فالمادة ولازم تعيدينها
وطبعا كل تقدير له نقاط معينة تنحسب ع معادلة رياضية معقدة شوي
ويطلع لج المعدل من 4 فاغلبية الجامعات
وحطي فبالج انه معدلج لازم بكون اكثر عن 2
لانه تحت 2 وضعج الاكاديمي ضعيف واتكونين مهددة انج تنطردين من الجامعة
يعني لازم تشدين حييييلج فالجامعة
لانه المادة اللي تدرسينها فسنة فالمدرسة بتدرسينها بفصل واحد فالجامعة
ان شاء الله ما اكون نقصت شي ولا نسيت شي
ولو عندج اي استفسار ثاني انا حاضرة وفالخدمة
والسموحة منج ع الكلام الطويل
عاشقه بلادي ما قصرت في انها اتقولج عن الجامعات ماشاء الله
بس بقولج عن السكن وعن حياه السكن وكيف هم ايعيشون اهناكي
أول شي اترتيبين اغراضج كلها جنج رايحه بسفره طوويله ^.* اتركبينها الباص
مثلا من الاعراض كفرج + ثلاجه صغيرونه + سدات اتحطين فيها الاغراض في حجرتج بالسكن
انزين تركبين الباص وعندج من بوظبي إلين السكن ساعه وشي تقريبا هذا لو كان الباص بطئ
توصلين السكن وايكون عندج اغراض وااايد تزقرين ( الدارلنك )
اللي هي العامله اهناكي اتشيل اغراضج
اتساعدج بالاحرى تسحبها لج بالكاري الصغيروني هع ايزين إذا السكن فيه لفت
اهني بيكون الامر عادي
تطلعين بسرعه بس لو كان دري اهني تهلكين وحاسبي لا طيحين وإنتي شاله الاغراض
( اتحسين بمتعه ^^ )
المهم وصلتي رتبي اغراضج جفتي اربيعاتج بتكونين يايبه وياج آكل من البيت اتيلسون في
الصاله وتاكلون وترمسون وتجوفون الجناح الثاني وتيلسون وياكم وتروحون
ترقدون الحين تقسيم الحجر في سكنات اتكونين في الحجره ويا وحده وفي ويا 3 ..
عاد الصبح تسميعين اشكال وآلوان المنبهات حق صلاه الفير وبعدين ع الساعه 7 تسمعين المنبهات
بعد وكل واحد وحسب دوامه الدوامات تبدا 7 وتخلص 8 تقريبا واهني كل
واحد وحسب السكاجول ماله ( الجدول )
والحين بخبرج عن الاكل الريوق الصبح يفتحلج مطعم السكن من الساعه 7 إلى 10 ونص
والغدا من 12ونص إلى 3 ونص
والعشا 7 ونص إلى 10 وتروين المطعم إنتي وشلتج إلي اكثر من وااااااااايد هع
تتعشون إهناكي واكثريه
الاوقات تتعشون وتتريقون وتتغدون فالكليه هب عسب الدوامات وضيجها لا آكلهم
ارقى وأحلى بيوااايد وخاصه
( المسكت موزريلا والسيزر سلت والبيتزا والمكرورنه والراب والجايينز والباسكن ^.* )
عاد اتخيلي انتي وربيعاتج رااايحين وشو اتسوون من الخربطيييشن وبيكون ما شي
رياااييل كله بنات × بنات ^^
ويي وقت الدراسه وكرافها وشغل البروجكتتات والشروحات ما شي اهني بناطلين
اتييلسين انتي وبجامتج مجابله الكتب ولاب توب سوالف الدراسه وتفكرين كيف
اشرح وشو اسوي وباجر الاستاذ كيف بيقيمني
وع فكره بكل سكن ايكوون في مسيد يعني صح ما شي وقت نصلي فيه
بس في كل تمه يوم اليمعه نصلي فيه جماعه وحتى رمضان انصلي الترواويح جماعه
وفي رمضان الحياه غيير تفطرين ويا ربيعاتج وتتسحرين وياهم ما تجوفين وايد مسلسلات
اتكونين تدرسين او تقرين قران وتيلسين ويا ربيعاتج تتمشين في السكن
ويسوون في السكن مباريات لكره السله وخاصه في رمضان بطولات اتكون هع
ويكون ساعات بين الجامعات بطولات وعن الفطور في رمضان اتيبون الاشياء شرات
الهريس والسلطه اللبن التمر من مطعم السكن والباجي علينا يعني انتوا اتسونه يعني
الفاضي ايسووي شي ع الفطور في مطبخ الجناح
ومرفقات السكن قتلج عن المطعم وفي النادي الاجتماعي هذي مال الانشاد
والتلفزيون اللي في دش يعني تلفزيوناتنا اريل هع ما شي قنوات فضائيه يعني إلا في النادي
وفي الجمعيه نفس الجمعيات التعاونيه هي نفسها وفي الممشى بعد
خلصت الامتحانات أخر الكورس بيكون في خريجات اهني راح تستوي حفلات تخرج
ويتخرجون اربيعاتج اللي كانوا قبلج وأخر لحظه راح تبدى مناحه الصياح عشان
بتيين الكورس الياي وبتلاقينهم ماعندج
في الجناح بس منهم ايردون ياخذون دبلوم ^^
هيه نسييت حفلات اليوم الوطني واليوم الفتوح اهني ما شي دراسه ايكون يوم مفتوح
وبعد لو كانت البنت يديده ع السكن اول اسبوع يمكن ما تتقبل بتم اتصييح وتبا اترد وما اعرف
شو بعدين بتتعود وبتعتمد على نفسها وتتبلو شخصيتها اهناكي
وبعد ( الدرالنك ) يوم ايي العامل ايصلح الليت او مكيف او اي شي
اتعرفي كيف اتنبه اتقول ( ريال دارلنك ) كله اييون بس الصبح اتعصبين من خاطرج
بقول شي صح السكن أو الجامعه صعب الحياه فيها بالبدايه بس بارداتج انتي
راح تثبتين منو انتي
وفي بعد وااايد اشياء بس قتلج اشياء وايد بتفصيل اي استفسار حاضرين لطييبين ^^
هلا شوآخ ، شحالج . . ؟
اممــ ما ابغي اكتب شي غير اني اجاوب ع سؤالج . .
لان وبصراحة كل ما اقول ابغي اقرى قصتج ما احصل الهدوء
اللي ابيه عشان استمتع بكتابة رائعة من شخص رائع . .
وبعد ما عطيتيني دافع اني اقرى القصـة باسرع وقت ، بجاوب عليج بسرعة . .^^
وبسير اقرى . . السبب : حسيت ان البنت بنفس عمري ^^
اما عن الجامعـة . . لان توني داشة الجامعة بخبرج عن نفسي وشو سويت وكل شي . .
يعني بخبرج باللي اعرفـه . .
واسم الجامعة : جامعة الشارقة . . "مب الجامعة الامريكية " . . لان وايد يتخربطون .. الشارجة مب مختلط
اما الامريكية اللي في الشارجة مختلط . .
الطالبة اليديدة بالجامعة تسمـى مستجدة . . ،
والجامعة بقول من اقوال ادارية بجامعة الشارقة " من بداية الدراسة لنهاية الدراسة بهدلة " . .
//
ذهابي للجامعة كان يحتويني بربكـة لانك تواجه عالم وجها لوجه . . يعني تفرق عن المدرسة بوايد . .
بايام التسجيل . .
كنا نطلع الصبح من وقت قولي عالساعة ست او ست ونص .. على حسب سرعة الشخص . . خخخ
" البيت بعيد عن الجامعة درب ساعة وربع " . .
والمشكلة ان الجامعة huge كبيـرهـ . .
يعني اذا قالوا لج خذي ورقة وسيري عبيها وبعدها سيري عند فلان عسبت يوقع عالورقة ..
سيري بالسياره لمبنـى بعيد . . وبعدها هالفلان بوديج مكان غيرهـ . . وتمي سيري وتعالي . .
عادي يعني تكوني على هالحالة . . خمس ايام . .
والمشكلة بهالخمس ايام قولي ثلاث ايام ترجعين البيت ولا تحسين انج سويتي شي غير ركيض من مكان لمكان بهالجامعة . .
يعني على الاقل بعد التعب وبترتاحي لو حسيتي انج انجزتي شي صح . . !
وطلعت الصبح بهالخمس ايام تكون من ست او ست ونص ونرجع عالعصر تخيلي . . ّ!
وتخيلي عاد لو كان الشخص صايم . .
انا بنت وقدر اتحمل . . ّ!
اما اذا كان ابوج صايم وكبير في السن تحسي تعب تعب من الخاطر عليـه . .
" الله يخليه لي ان شاء الله " . . ّ!
حتـى بخاطري على هالركيض والتعب اللي تعبناه محد من اخواني . . ولا واحد منهم
بيركض وبيسوي لي . .
وبعد التسجيل وهالتعب . . قالوا لي ما يستوي تحصلي سكن . .
لانج يايبة بالايلس 4.5 . .
الايلس هو امتحان كله انجليزي ، مقسم لاربع اقسام قراءة وكتابة واستماع وتحدث . .
ولازم تييبين فيه 5 وفوق عشان تنقبلين . . ولا بتقعدين تدرسين انجليزي مكثف سنة كاملة . .
وعاد اللي تخصصها طب > نفسي =) . . ما تبغي اضيع سنة وهيه بتدرس سبع سنين واكثر . . ^^
بس رضيت بامر الواقع بعد ما عرفت ان يستوي آخذ مساقين " مادتين " من مساقات الجامعة . .
//
الدراسة , ,
روحي وتعالي كل يوم . . سرت الاسبوع الاول . .
وهالاسبوع ارشاد . . والتسجيل وتكميل الاجراءات . .
ولازم يعطوج جدول المواد . . عاد مذلة الين يعطوج الجدول بس ما الومهم بعد . .
مب مقصرين . . الن مب انا بس الموجودة بالجامعة غيري الالاف البنات ^^
اوك عطوج جدول مساقات الانجليزي المكثف . . بعد تريي الجدول الكامل مع المساقات الثانية . .!
والمشكلة يوم بيعطوج الجدول عادي يكون غلط او فيـه اي تصحيح وما خبروج عنه . .
وردي راكضي عالجدول وسالي وشوفي . .
والله يخلي الاستاذة . . هو المفروض اناديهم سير او كتور او اي شي اما انا اناديهم تيتشر هع ^^
. .المهم ما قصروا معاي الين ما فهمت وضعي عدل . .
واسبوع الارشاد يخبرونا شو بندرس هذا . . > هذا اللي كنت اعرفه . .
يعني اللي بيي ايي واللي ما بيي عادي . .
وطبعا انا اسير دومـي . .
وانصدمت يوم عطونا واجبات الدنيا باسبوع الارشاد ومب كل البنات موجودات !
خخخ
يعني لا تصدق اي شي ينقال واذا تبغي مصلحتك الحق على عمرك واسال وشوف . .ّ!
وخلص اسبوعي الاول امبارحة ^^. .
وهاذي علومـي وان شاء الله تستفيدي منها . . ولو تبين اخبرج كل اسبوع او اسبوع . .
عادي عندي وترى البنوتات ما قصرن خبروج اكثر عني وزود . . سلام . .
بسـبسـ : بما اني مستجدة بتحسي رمستـي كبداية ضيج وهم لاني ما انلام يديدة وما تعرفين شي . .
وتسجيل وركيض . . وبعدهاالامور تتيسر يقولون وان شاء الله خير ^^
واايـد عشَقت ردج الطوُيـل أنا ، جي حَسيت جنه ردج و رد نكسْت
هم اللي أترياهُـم (=
و بآلنسبَة للاختصَار ، بصراحَـة معلومَـة حلوَة و يديدَة أول مرَة أسمعها ZU !
و شُكرا هالقـــــــــــــــــــــددد لأنج حطيتيلي التَخصصْأت ، اثتانثييييـت ههههـ
لأنَـي تدرين ماعَرف ف جي حَسيت كَششخَـة ،
بعَد مب حق القصَة عسب أنا أعرف بعد لاه . . . !
و جأمعَـة حمدَأن تصدقين أول مرَة أسمَع بها بَس شكلها NiCe . .
اكتشَفت من كلامجْ إن من جامعَـة ل جأمعَة يختلف من ناحيَـة الغياب و النظام
و هآلششَـي ماكنت أعرفَـه 
،
و صدق صدق الدَرجات كنت أحتَأجها ، زين يوم قَسمتيلهَأ لي ،
و بالنسبَة للمحاضَرات شَي جميلْ ، يعني مُب شَي روتيني شرى المدرسَـة ،
بصَراحَـة أشياءات يديدَة عرَفتها
و معْلومأتج دقيقَـة ماشاء الله عَليج ، بالأرقام و كل شي مَفهُوم
شكرا شكرا قدا عشوووقـة 
،
عاشقة بلادي . . ّ!
نكسسـت . . ّ!
اشكركم . .^^
والسبب شواخ ^^ > بعد اشكرج . .ّ!
الصراحة وايد اشياء ما كنت اعرفها ويت رمستكم وموضوع شواخ بكبره بالوقت المناسب . . ّ!
لان توني بدخل الجامعة ^^
سلام . . ّ!
يزاكم الله الف خير . .
شَكلج إلا بنوتَـة سكن
حممممممممممممممسستيني للسَكن فُوق ما تتصورينْ { 
} . . !
و أنا أصْلا فخَأطرْي سَكن من القَلللبْ ، ..
لكن في مُعَأرضَـة من الحكومَـة العليَـأ !! عمومأ أنا خل أخَلص أول ثنوي أول
و عقب يستوي الخير <– حسستج لاهـ ههههههـ ،
انزيــــــــــــــن يا نكسـتْ
حَسُيـتَ بحَلاة كلمَـة [ السكَـن ] من كلامًـجْ ، خصوصأ إني إنسَأنَـة حاطَة
فـ بألهَـأ هالشَــيْ ،
في أشياء توقعتها جُـي و انتي أكدتيلي إياهَـأ
و بالنسبَة لكم وحدة فالسَكن <– هالشي زين قلتيلي ، Because أحتاجَه
فالقصَـة 
، و عَن الأيام المَفتوحَـة بعد هاي مَعلومة New ، و زين يوم إنج
ذكريتيهأأأ
نكسُتوه بييبج عند أهلي ، عندج 3 سنَوات اقنعيهُم عدددل ها زين مازين هههههـ
شُكراً جداً ، حليتيلي صورَة السكَـنْ أكثَر
في نَأس تلقين نظرتهم سَلبيَـة مايشوفون إلا الغَلَط ،
يعني ايوونج و يقولوج السَكن خياس و بويات و حَألَـة ، هو صح في ماقولج لا
بس بعَد السَكن فيه أشياءْ حلووووَة
و انتي كلْ شَي ذكرتيه حلووو ، حَبيت نَظرتج الإيجَأبيًـة !
شكرا لج . .
هلأ والله و عليج السَلام و الرحمَـة
يشعشع المنتَدى اليٌـوم . .
عـأد أنا أحُـب اييني عضوُ يكتب لي شَي من وَاقع حيَأتَـه
يعني يكتب لي عنَه هو نَفسَه و كيف تعامل مع الوَضع
أحب جيــه ، أرتاااااحْ أكثَر و أستفيـد أكثَر !
و عَـن القصَة بتنورينهَا والله . .
شَكلها الجَامعات شغغل مراكض عيَـل هااعْ ،
عسَاج انتي و أبوج ع القووَة كيوتي ،
و الحينَـه عرَفت ليش كنتيْ تبين امتحَأن آيلسْ ،
طبعا أنا كنت من المتطفلين على المَوضوع هع
بَس ما كان عندي ولا ربع شَي أفيدج فيهْ ،
شويَـة بالنسبَة للآيلس و السكَـن عندي استفساراتْ بحطها عقب هالرَد
حَبيت كلامج و عشُـت معَأج كـ طالبَـة جامعيَـة مُستجدَة
. .
و الله يوَفقج فهالبيئـة اليديدَة إن شاء الله
و الحمدلله إنج استفدتي من كلام عشوقَـة و نكستوتـة !
تحيتي لج 3>
أنا ماعرف أختي . . بَس بنشٌوف يمكن حَد من الأعضاء يفيدج ْ
من كلامْكم كلكمْ يَت في بألي استفسارات عددَة !
اقتباس من عاشقة بلادي :
ويطلع لج المعدل من 4 فاغلبية الجامعات
وحطي فبالج انه معدلج لازم بكون اكثر عن 2
.
.
يعني المعَدَل ، شرآت النسبَـة ولا شُو السالفَـة ؟
و ليش يطردُوني ؟ لأني ضعيفَـة و جي ولا في أسباب ثَأنيَـة !
أتمَنى شَرح هالنقطَـة من أي عضو أو عضوَة 🙂
.
.
.
إني صُوب السَكن شويَـه
متَـى الطَالب خلاص يرد غرفَته يعني بَس مافي محاضرات ؟
هل في وقت معَين ولا يختلف ؟ أحتاج مثـأل . .
و فالغرفَـة هو يختَأر الشَخصْ اللي يبى يكونْ وياه ولا هم يوزعون !
و إجازاتهم تكون شرات إجازات المدارس صح ؟
.
.
الحين إني صوب الآيلسْ كح . .
الحينَه يَعني لازم آيلس عسَب أكون فالسَكن ولازم أكون يايبة 5 ؟
و شسمَـة ’ في شُروط ثانيَـة للسكن ولا بَس جي ؟
.
.
و أي حَد عندهـ إضافات يمين يسَار أو أي مداخلَـة ترى حياااااكمْ
أبى أعرف واايد أشياء أنا هع ، فبالعَكس مب تقولون الأعضاء ردوا و خلاصْ
لا مب مشكلَة كل حد عنده شي يقولَـه لا يتردد ^^
و شكرا لكم ،
.
.