2024.

( أيـــــام القيظ أول و أيام القيظ الحين )

زمان أول أيام القيظ والحر اللي مثل ها الأيام كانت وايد حلوة عند أهالينا قبل

كانوا يقيظون في النخيل والضواحي مب مثل الحين يشردون من الحر بالسفر

برع البلاد كنه البلاد ما فيها مكان يقيظون فيه مساكين والله

ما عاشوا حياة أبهاتنا وأمهاتنا قبل ولا قاسوا اللي قاسوه أهاليهم

أذكر يوم كنا صغار في ها الأيام أيام القيظ نطلع كشدة ( كشتة ) عاد وين

كانت كشداتنا في النخيل وللا على البحر بس و كنا نستانس فيها وايد

مب مثل اليوم يا إما سفر وللا قاعدين تحت الكنديشن على النت والتلفزيون

زمان أول أذكر كنا نتريق في البيت ونطلع من صباح الله خير نروح نقيل في

النخيل عاد وين النخيل ووين البيت ناخذها مشي من الحارة للنخيل نمشي تقريباً

ساعة وللا ساعتين في الحر و ما شاء الله كل يوم على الحال ولين آخر

الأجازة ما شاء الله صايرين كنه صخام من الشمس احترقنا مب مثل اليوم

لو نطلع برع الحجرة دقيقة نقول ( أوووووف حر ) ونرد تحت الكنديشن يالله

بالستر .. من نوصل النخل يالله عادي كل واحد ياخذ مخرافته ويمسك له نخلة

ويخرف النخلة ليت يترس المخرافة كلها واحد يمسك نخلة الصلاني وحد الخنيزي

وحد الشهل وكنا شاطرين في ركب النخل وبدون حابول

وللا نروح لشير الهمبا والزيتون ( الجوافة ) والرمان واللومي

كانت النخيل قبل كلها خضرة ونخيل مب مثل الحين ميتة مع أن الماي كان

خريقة ما تحلية ما شاء الله ومن نخلص نتغدا وعاد شو الغدا مب محشي ولا

معكرونة بالباشميل لا لا .. قدر عيش و مالح و للا ذيك البرية اللي ما كلها الشيخ

وللا سحناه بس كنا نتخبل عليها قبل .. بس اليوم والله ما نعرف للأكل

وعقب ما نتغدا نروح عاد نلعب تحت هاذيك الشمس الحارة لين ما نشبع

ونصير مثل الصخام وبعدين نروح نغط اعمارنا في الحوض نكمل لعب

ومن تغيب الشمس كل واحد شل كشاره و يالله على البيت نوصل البيت ومأذن

علينا المغرب والروحات كانت ويا الييران شلل و يا بعضها

كانوا الناس قبل غير عن الحين الناس كانت لبعضه اليار لليار

مب اليوم اليدار لازق في اليدار والبيت مقابل البيت ولا يتعارفون سبحان الله

يالله وينها ذيك الأيام والله اشتقنا لها وايد

لو عندنا آلة الزمن كان زين كان رديناها ذيك الأيام بس يالله الحمد لله والله

_____________

القيظ : الحر الشديد

النخيل : المزارع والضواحي

كشدة ( كشتة ) : رحلة

الكنديشن : المكيف

نتريق : نفطر ( وجبة الفطور )

الصخام : الفحم

مخرافة : سلة من سعف النخيل يجمع فيها الرطب

نترس : نملأ

الحابول : الحبل الكبير

الخنيزي والصلاني والشهل : من أنواع نخيل

الهمبا : المانجو

خريقة : ماء مالح و أحياناُ يطلق على ماء البئر

المالح : وجبة اماراتية من السمك المملح

البرية : نوع من السمك الصغير ويطلق في بعض مناطق الدولة مثل العين بالصد

سحناه : سمك البرية بعد تجفيفه وطحنه

كشاره : أغراضه