الوسم: الشعبيه

الاكلات المشهوره لكل اماره ..

خلونا نبتدي بأكلات كل أمارة مشهورة بأكله معينة عندهم…

بس دخيلكم عاد ما نبا حد منكم رزة يظهر لنا ويقول أونه بوالعريف ….. صك الدعنه ….

أنا هذه المعلومات أكتبها بس حق اللي توهم ظاهرين من البيضة ….. واللي أسمّييهم عيال الهمبرجر ..

اللي ما يعرفون ولا شي عن أكلات بلادهم …. وهمهم بس طايحين في هالهمبرجر والهوت دوق والزنجر ولوعة الجبد والسقم …..

*************

أكلة هل الفجيرة :

حافظ على هل الفجيرة … من تيهم أتقييّل عندهم ضيف … الله على الكرم الطافح فوق اليبال …
وخصوصا بعد يوم يقربوبك عندهم وتاكل هذيج الأكلة ما ودك بعد تظهر من الفجيرة .. بس الود ودك أتّم تظرب بالخمس ألين يوم الثاني ..
وأكلتهم مشهورة وهيه : طاسة حلوى حارة وعدالها دلة أقهوه الملقمه في حزتها

************

أكلة هل راس الخيمة :

ياسلام أتسلم على هالأكلة المشهورة اللي عندهم .. والله صوبنا ياهل راس الخيمة يعني فداكم .. أموت على طبيخكم اللي ما ينطبخ اللا على ظو يريد وحطب وما بينهن طابوقتين .. ياويلي بطني قام يغر ويحتاس حيس ..

الصراحة يعت مشتهي طاسة جامي ويقط ولبن من أمارة راس الخيمة ……… السموحة بويه منكم ..

من رخصتكم انا ظارب سلف وساير جدااااا راس الخيمة باكللي جامي ويقط وبشرب لي كلاص لبن …… ومحد يقوللي ..

أشعنه عاد ما عندكم جامي ولبن ويقط في بيتكم … يابويه الجامي واليقط واللبن من أمارة راس الخيمة الصراحة غييييييييييييييير

*********

أكلة هل أم القيوين :

لاااااااااا .. كله عاد ولا هل أم القيوين ..

الصراحة عندهم أكلة والله ما تخطر على بال واحد بيموت من اليوع .. أسمييييه عندهم أكله ..

ما يطبخونها اللا حزّة الغدا من عقب صلاة الجمعه ..

وهيه أكلة البياح : تراهم مشهورين أبها ومحد شراتهم وشراياهم .. أنتوا ما تشوفون عربهم ومواطنينهم شقايل الواحد أو الوحدة منهم هالمتن ..

مدربحات مربربات والجسم على هالثقل تلقاه شرات المزهرية .. ياعيني ياعيني

************

أكلة هل عيمان :

ما يحتاي بعد أزيد عليكم الزود .. معروفين هل عيمان بخبز الرقاق هنتين أبييّزة .. وخصوصا بعد أوف حلاته اذا كان مدهون بدهن خنين .. وووووووه ..

وحظك من السما لو حالفك الحظ حد منهم عزم عليك تقرب عنده في البيت تاكل من ريوقهم أو غداهم أو عشاهم …

سامحني .. أنته والخير وأنا كلنا بنكون رباعه .. ياجماعة الخير عليك بخبز الرقاق المدهون بدهن خنين من هل عيمان

*************

أكلة هل الشارجة :

لا لا لا .. كلكم غلطانين .. هب الدانقو ولا شي ولا حتى الباجلة .. هذه كلها خرافات واحد مصطول يوعان …..

عندي انا المعلومة عن أشهر أكله عند هل الشارجة ……….. الصراحة غلبتوني .. هيه نعم صدقتوا ..

ماشي أحلى من الدانقو حزّة العصر وحاط جدامك هالطاسة الممزورة دانقو ولوميتين من الحامض .. تعصرهن في الملة أمممممممم ……. أوففففففف أشوووووو هالعذاب ياجماعة الخير ..

أبتسم أنته تاكل الدانقو في الشارجة

************

أكلة هل دبــي :

أكلة هل دبي المشهورة هيه : الهريس .. واللي ماياكل منها يخيس .. وهل دبي معروفين في الأعراس لازم يكون في وسط الحوي جدر هريس ..

واللي يقرب لازم يغرف له بالمظراب في طاستة .. وأنا مستحيل آكل هريس من أي أما رة ثانية اللا دبي .. أقصد كل أمارة ولها خصوصيتها في أكلاتها الشعبية المشهورة ………

وقربوا هريستنا تراها طايحه

************

اكله هل بوظبي والعين

كل أكله روحها صوب .. وكل وحده منهن ترمس عن عمرها .. ما أدري أشوووووو أطريلكم واللا أشوووووووو ..

ترى كل وحده أحلى من ربيعتها .. بس أن بغيتوا الصدق : ترى ريوق هل بوظبي وهل العين شي مذهل وخرافي ..

حد منكم جرّب يتريّق من ريوقهم ..؟؟ هيه نعم أنا .. ياأللااااااااااااااااااااااااااه .. هذه الأكلات واللا بلاش ..

يعني أفداهم ويطول في عمارهم عربنا القبايل هل بوظبي والعين فديتهم والله .. يعني أبلاهم ……… أوه سامحوني نسيت أخبركم بأسم أكلتهم المشهورة على الأقل في نظري أنا ……

خبز خمير بثيث مفروكه والمظروبة … والله العظيم أني ما أتمصخر هذه أسامي بعض الأكلات الشعبية المشهورة عند هل بوظبي ونعم وسبعة انعام .. وبعد حتى عند هل الأمارات الشمالية ..

بس المرجعية والأصل ترجع لهل بوظبي والعين في أكلاتهم المشهورين أبها

و الله هذا الصدق .. و هذا اللي ينبان على الجبين ..

مع تحيات

ولد العبيدلي