يزاك الله خير ع الموضوع الطيب
الجزء العاشر
والاخير
كانوا بيت عم سالم ( بيت ابو عبود ) جايين ليهم زيارة ….. وكانت فطوم وياهم …. وسلوم بالاستقبال ….. ههههههه منظر لا يحسد عليه ….. الكشه والحاله مغرقه ماي …. ويرتجف مو قادر من البرد ولا قادر يستوعب الموقف ….. الدم وقف عند راسه من الفشيله …. حبيبته تشوفه في هالمنظر ….. خل ينحاش احسن ليه .
( ابو عبود ) : ههههه ها سالم … من وينه جاي ؟؟؟؟؟ وليش مغرق ماي ؟
سالم وهو يطالع حمود الي توه بينسحب عنهم : لااااا عمممميييي …. ببسسس كككناااااا في البببحررررر ….. وووو بالللغللط طحتتتت فييي الماااي .
( عبود ) : هههههههههههههه والله شكلك …… رهيييييييييييب …. يجننن .
سلوم وهو ميت قهر على حمود وفشيله من بيت عمه وخصوصا فطوم : عبووود ششغلللك بببعدديييين ممووو اللحيييين …… تتتتفضللللوا حييياكم البيييييت بيييتكممم .
حمود انسحب عنهم …. ودخلوا بيت ابو عبود ويه سالم بيتهم …. وسلوم بعده يرتجف من البرد ……. لان الجو كان هوى .
( ابو عبود ) : ها سالم يا ولدي …. ما في احد في بيتكم ؟
( عبود ) : اي ابويي … البيت صخه … ما فيه حس ولا لوده .
( ام عبود ) : ووينه امك عجل ؟؟؟ ما اشوفها في البيت … هي ما تطلع هالحزة .
( فطوم ) : شويه شويه عليه عاد …. ما تشوفونه ميت برد …. ههههههه خله يروح يبدل ثيابه ويسخن شوي …. علشان يعرف يجاوبكم على اسئلتكم .
وسلوم في حاله يرثى ليها …. الاشفه رزقه … والجسم يرجف …. والثياب مبلله …. وداخله ميت قهر على حمود .
( سلوم ) : ااخخددووااا رراحتتكم في اللببيتت … اللببييتت بييتتككمم …. انااا برروووح اشششووف اددداا فييي ااححد في البيييت وبنناااديه لييكم …. علللى مااا ارروحح ابدددل فييااابي واججييكمم ….. سسااامحححووننااا عااااد .
( عبود ) : هههههههههههههههههههههه ……. انته حاطينك على الهزاز والا ويش يعني ؟؟؟ قلنا جايتنك برديه …. تهز كلامكم الاويش ؟؟؟ هزيتنا وياك من اول حرف قلته الى اخر حرف …. ويا ليت فهمنا منك شي .
( فطوم ) : ههههههههههههههه …. يقول ليك خدوا راحتكم …. البيت بيتكم بيروح ينادي ادا في احد في بيتهم يجي يقعد ويانه … على ما يبدل فيابه ويرجع .
( عبود ) : لا صدق والله ؟؟؟؟ توني ادري …. سويتيني عاد كلش … ما فهمت الي قاله … ما يصير نمزح يعني …. هالوجه .
( ابو عبود ) : يا ولد …. بسك طولت لسان على اختك … هي ما قالت شي .
( سلوم ) : هي انته عبود وجه القوطي … لا تغلط على بت عمي لا جيت سويتك هزاز اخس مني .
( فطوم ) : تسلم سالم ما تقصر والله … بس ماعليك منه …. انته روح بدل ثيابك لا تمرض …. الجو بارد .
كانت قاعده جمب باب حجرته في الصاله … وهو داخل الى حجرته يبدل ثيابه طاف عليها وهمس : خايفه عليي … من قدي …. اي .. كل شي ولا الغالين يغلطون عليهم .
************
وقف عند باب بيتهم …. يطالعه بس ما ليه قلب يدخل …. مع انه المفروض عليه يشوف امه واخته ويش يبون بعد غياب ابوه …. ويكون رجال البيت …. وخصوصا ان هو ولد ابوه الوحيد .
( حمود ) : انا ما بدخل البيت الا بالليل … ما اليي وجه اقابل امي وجلول ….. الي سويته كبير …. واكيد هم شايلين عليي بقلبهم … وزعلانين مني ….. خلني اروح اشوف ابووي الحين …. وارجع الساعه 2 الليل بدون ما يحسون عليي .
*************
( جلول ) : اماه … متى بتروحين الى ابويي المستشفى اليوم ؟؟؟ امبي اروح اشوفه …. ما يصير من ترقد الي الحين ما خليتوني ادخل عليه …. حرام عليكم هاده ابويي مهما كان ….. ومن حقي اشوفه
واطمن عليه ….. وحمود من يومها ما شفناه … ولا ندري عنه خبر …. يا ربي ويش صاير بالدنيا …. ويش صاير …. اماه قولي اليي هاده امتحان من ربي العالمين ؟؟؟؟ هاده بلاء الله يبي يشوف اي قد نصبر واي قد نتحمل ؟
وقامت تصيح وتصيح وامها تحاول تهديها .
( ام حمود ) : يا بتي لازم نصبر ونتحمل ….. وكل شي من الله قدر ومكتوب …. وما يصير نكون جاحدين بنعمه ربنا ….. ونعترض على حكمته ….. دكري ربش يا بتي …. واحمديه على كل حال .
( جلول ) : الحمدلله ربي العالمين …. استغفر الله …. استغفر الله ….. بس اليوم ضروري ادخل على ابويي واطمن عليه …. حتى لو منعتوني ….. وما في احد يقدر يمنعني من ابويي .
( ام حمود ) : اهدي يا بتي … وما يصير الا الخير … انتين اهدي بس .
***********
دخل حجرته يبدل ثيابه وهو يتحلطم على حمود .
( سلوم ) : عسااه ريح ….. الي ما يستحي … ما دور الا اليوم يغرقني …. اليوم الي بجون فيه بيت عمي …. زين جدي اتفشل قدامهم … لكن ما عليه … ان حصلته الا ارجع اليه العضه والبهدله هادي …. واشوة ان ما سوى شوي في التلفون ….. والا جان تورط ورحت فيها ويه ابويي …. وزين ان محد التفت اليه من بيت عمي …. خلني ارجعه مكانه قبل لا……….
ما كمل كلامه وطب عليه ابوي في حجرته …. وشافه توه بيطلع منها وهو حامل التلفون بيده .
( سلوم ) : هــــــــــــــا ….. ابوييي … ووويش ججيبك حجرتي ؟
( ابو سلوم ) : ويش جيبني حجرتك هاه ؟؟؟؟ اراويك جيفه تبوق تلفوني وانا عافس عليه البيت من الصبح ولاني محصلنه … واقول وين راح ؟
*************
طق باب الحجرة … ويوم سمع صوت الطبيب يقول اليه ادخل … دخل بادب واحترام …. وهو باين عليه من وجهه الخوف من مفاجاه جديدة …. يمكن ان الطبيب يفاجئه ابها .
( الطبيب ) : اهلا محمد تفضل ادخل .
( حمود ) : سلام عليكم …. شحوالك دكتور عباس ؟
( الدكتور ) : وعليكم السلام والرحمه …. الحمدلله احنا تمام …. انته ويش احوالك اليوم ؟
( محمد ) : خلك من اخباري يا دكتور …. وطمني على الوالد …. اليوم مريت عليك اول … قبل لا امر عليه …. هااااه ان شاء فيه تحسن في حالته عن الصبح ؟؟؟ وان شاءالله في اخبار تطمن .
( دكتور عباس ) : لا عندي ليك اخبار واجد بتفرحك .
( محمد ) : صدق دكتور …. يعني الكلام الي قلته بالصبح انساه … بتقول اليي كلام يطمن ويريح بالي … تكلم دكتور تكفى … الله يخليك تكلم وريحني ……. انته ما تدري انا شقد اعاني واتالم …. هاده ابويي الي بعمري ما شفت ابو نفسه …. هاده الخير والبركه …. تكلم دكتور ويريحني .
( دكتور عباس ) : لا لا لا محمد انا توقعتك اقوى من جدي … ليش هالدموع ؟؟؟ انته رجال والرجال ما يصيح …. خلك قوي ورجال ….. وخلي ابوك يفخر فيك .
( محمد ) : يفخر فيني على ويش ؟؟؟؟ انا واحد فاشل …. فشلت في دراستي وفي حياتي …. وخيبت ظنه وبهدلته … بدل ما اكون اليه ولد حنون وارفع راسه …. خيبته وكسرت ظهره ومرضته ….. دكتور انا السبب في كل الي يصير حق ابوييي … انا السبب …… انا السبب .
وفجاءه جاه الصوت من ورى ظهره .
( ابو حمود ) : الحمدلله الي بلغني اشوفك رافع راسي ….. واشوفك رجال اقدر اعتمد عليه … وقادر يتحمل المسؤوليه ….. احمد ربي مليون مرة باليوم …. الي هداك ونبهك على طريقك .
**********
بعد صلاة المغرب … في بيت ابو حمود … ام حمود وجلول صلوا وتجهزوا وتوهم بيطلعون ….. علشان يروحون يطمنون على ابو حمود المستشفى .
طق جرس الباب وكانت جلول قاعد في الصاله تحارس امها تكمل لبسها ويروحون المستشفى .
" ررررررريييييييييين روووووووووووون …… ريييييييييييييييييين ررووووووووووووون …. ريييييييييييييييييييييين روووووووووووووون "
( جلول ) : حشى … انزين انزين ….. الحين بنجي … مو تخربون الجرس ….. منهو في الباب ؟
وتوها بتفتح الباب جان يطلع في وجها حمود وهو مجود ابوه ويساعده يمشي .
( جلول وهي تصرخ ) : ابووووووووووووووووويييييييييييييييييييييييي …. حمووووووووووووووووووووووووووود ……. اماااااااااااااااااااه الحقيييييييييي تعالي شوفي منهوووو عند الباااااااب .
وقامت تحضن ابوها وتبوسه وتتعلق فيه .
( حمود ) : ههههههههه يالملقوفه الوالد توه طالع من المستشفى …. شوي شوي عليه .
( جلول ) : وانته وينك حمود …. من ابويي ترقد ما شفناك …. خفنا عليك يصير فيك شي …. ما تمر البيت …. ولا نشوفك في المستشفى عند ابويي اذا نروح نزوره .
( ابو حمود ) : الحين بتوقفني وانا ابوك عند الباب ؟؟؟؟؟ تعبان ودني داخل … وبعدين سولف ويه اختك على راحتك .
وبجيت ام حمود وهي تصيح وميته من الفرحه .
( ام حمود ) : كلووووووووووووووووووووووووووووووش …… كلووووووووووووووووووووووووش …… ويه توه ما تنور البيت …. رجلي وولدي ….. الحمدلله على السلامة ابو محمد … ما تشوف شر ….. تونا كنا بنجي اليك المستشفى …. جيفه طلعوك واحنا ما عندنا خبر ؟
( حمود ) : انا بقول اليكم السالفه كامل ….. بس اول شي خولني بودي ابويي يرتاح في حجرته .
*********
( ابو سلوم ) : ها شقلت وانا اخوك ؟؟؟؟ بس نحل المساله قبل لا تتعقد … وقبل لا تروح البنيه من ايدنا ….. وولد عمها اولها ابها من الغريب .
( ابو عبود ) : والله فاجاتني انته بالطلب … وما كنت متوقعنه ابدا … والهيئه ان احنا كنا نايمين ولا التفتنا لهالشي .
( ابو سلوم ) : هههههههههه وانته الصادق …. انا اليوم توني عارف … سلوم ماخذ مني التلفون بدون ما ادري …. ويوم كنتون موجودين في البيت … وهو كان داخل حجرته يبدل …. سمعته يهدر بروحه قعدت اتصوخه ….. وسمعته يقول نقال ما نقال واكتشفت انه ماخذ نقالي …. سويت روحي معصب عليه وجرجرت منه الكلام …. لما اعترف
اليي انه ماخدنه علشان يكلم فاطمة بتك … وحلف انه ما كلمها لانه ما في احد في بيتكم يرفع التلفون …. لانكم كنتون جايين البيت …. ولما سالته ليش يبي يكلمها …. قال اليي انه يحبها وهي تحبه … وهو كان ناوي يقول اليي …. علشان نحجز البنت اليه من الحين … وما تروح لواحد غيره …. ودامهم يحبون بعض … لا نكسر بخاطرهم وبقلوبهم …. ولما يتخرج ان شاءالله سلوم من المدرسه نملج ….وبعد سنتين نعرسهم قد صار اليه شغل واعتمد على نفسه اكثر …. ها شقلت ؟
( ابو عبود ) : انته اخويي الكبير … وكلمتك هي الماشيه … وما بلاقي واحد يحب بتي ويحن عليها ويحافظ عليها قد ولدك سالم .
وفجاه دخل عليهم سلوم المجلس وقعد يرقص مثل المجنون .
( سلوم ) : بعرس وبعرس وبعرس وبعرس …. هييييه يا ناس بعرس بعرس بعرس …. اي والله اي والله .. دان داانييي دانيي دانيي … اردح ادرح اردح اي والله اي والله .
( ابو سلوم وابو عبود ) : هههههههههههههههههههه ….. اقعد يا ولد … بلا حركات فاضيه …. ترى نهون .
( سلوم ) : لا لا كل شي ولا التهوين ….. انا اعجبكم واصير خوش ولد.
وراح باس راس ابوه وعمه وطلع عنهم .
*************
( حمود ) : انا كنت واحد جاهل …. ومستهتر وطايش … وما اتحمل المسؤوليه ….. داك اليوم تهاوشت مع استادنا العلوم وضربته … والمدرسه فصلوني … وخفت اقول اليكم ….. قمت جدبت عليكم وقلت ان المدرسه عطوني اجازة لان الاستاد مريض …. ابوي شك في الموضوع … وراح سال المدرسه وعرف الحقيقه … كنت نايم في البيت بالصبح … وهو من زود القهر دخل عليي الحجرة …. وقام يضرب فيني بالعصا ….. اول شي ما حسيت عليه وقلت اكيد احلم ….. لكن بعدين ما لقيت نفسي من حرارة الضرب الا دفعت ابويي على الارض وقمت اقط عليه الفاظ استحي اقولها …. وطلعت برى البيت … لقيت رفيقي سالم عند الباب ….. ولما شافني معصب دخلني البيت يهديني ويتفاهم ويايي ويعرف السالفه …. وبالصدفه لقينا ابويي عند الباب في وجهنا …. قام يصرخ عليي اطلع برة …. اطلع برة … لما اغمى عليه من شده العصبيه ….. حاولنا نصحيه ونقعده ما قدرنا ….. قعدتين انتين ( يقصد امه ) على صوت صراخي …. وشفتين ابويي مرمي على الارض … اتصلتون في خالي ونقلناه على المستشفى …. انا عرفت اني غلطان وندمت وتاسفت وصحت وعذبت نفسي …. لكن بعد شنو …. بعد ما ابووي صار مرمي مريض بالمستشفى …. كانت هذي صدمه كبير لي … اني اتسبب في مرض ابويي وعذابه …. قررت ارجع لنفسي الضايعه … اراجعها واشوف الخلل وين فيها …. قمت استحي ادخل
البيت واقابلكم … استحي اشوف نظرات الخوف على ابويي بسبيي…. وقررت ما ادخل البيت الا اذا انتون نمتون وتاكدت من نومكم ….. كنت ادخل اسوي اشغالي في حجرتي …. وبسرعه قبل لا تحسون عليي اطلع عقب ما اطمن عليكم ….. كنت اروح الى ابويي المستشفى واقعد عنده بالساعات في الليل والعصر … بعد ما اتاكد ان محد موجود عنده من اهلي او ناس اعرفهم …. اقعد اقرا عليه القران وادعي اليه واصلي …. واصيح عنده واكلمه واستسمح منه …. كنت احس انه يسمعني ويسامحني على الي سويته …. افرح واستانس …. ظليت على هالحال لما امس دخلت على ابويي …… وشفت حاله تغيرت …. بس ما كنت ادري للاحسن او للاسوء …. رحت ركضه عند الطبيب …. سالته عن حاله ابويي … صارحني وقال ليي انه مصاب بجلطه وهالجلطه ممكن تخليه مشلول طول عمره او يموت بعد اسبوع ….. ومن سمعت الخبر انصكت فيني الدنيا …. ما لقيت نفسي الا في بيت رفيقي سلوم واصيح عنده وحالي وصياحي جنوني …. حاول يهديني ويخفف عني …. مر الوقت وصارت حزت روحتي المستشفى بالعصر اطمن على ابويي ….. دخلت على الطبيب وكان على وجهي علامات استفهام ….. كان وجه الطبيب يبشر
بالخير …. بس كنت خايف يقول لي شي مو زين …. بشرني ان عنده خبر زين اليي وبفرحني … قمت اصيح واصيح ….. وفجاه سمعت صوت ابويي من ورايي يكلمني …. رحت اليه وحضنته …. استسمحت منه وبسته …. قعدت وياه وتكلمنا … قال اليي انه كان يسمعني يوم اني كنت اروح اقرا عنده القران والدعاء …. يوم اني اصيح عنده واترجاه يسامحني … كان ظني في محله كان يسمعني ….. حضني وعيونه تدمع دموع الفرح …. وقال اليي " انا قخور فيك لانك رفعت راسي وعرفت طريق الصح ومشيت فيه ….. لانك قدرت تتحمل مسؤوليه ابو مريض وتخاف عليه …. لانك لقيت محمد الضايع " ….. قمت اصيح وياه وقلت اليه " ابويي تدري اني اشتغل ؟ " …. قال اليي " لا متى ووين ؟ " …. قلت اليه " من يوم ما حاسبت نفسي وشفتها بدون احساس وقيمه …. ومن يوم ما لقيت محمد الضايع …. ورحت ادور عليه …. صرت ادور شغل من مكان الى ثاني … لما حصلت في مصنع التعليب … صرت اخلص دوامي واجي اطمن عليك واقعد وياك واروح البيت اطمن عليه بالليل وارد ارجع اليك مرة ثانيه " .
خلص حمود كلامه وعيونه متورمه من الصياح وامه واخته نفس الشي …. وابوه كان قاعد يسمع اليه وهو داخل حجرته …. كان مستانس على كل الي صار …. وعرف ان مرضته هادي هي صلاح الي ولده …. حمد ربه وشكره على كل حال .
النهـــــــــايـــــــة
تسلمين ع التواصل أختي السعمرانة
.gif)
